ഊട്ടിയിലേയോ കൊഡൈക്കനാലിലേയോ തടാകങ്ങളുടെയത്ര വിസ്തൃതിയില്ലെങ്കിലും അവയെക്കാളൊക്കെ ഹൃദയഹാരിയാണ് വയനാട്ടിലെ പൂക്കോട് തടാകം. പ്രധാന കാരണം, പൂക്കോട് കാര്യമായി വാണിജ്യവല്ക്കരിക്കപ്പെട്ടിട്ടില്ല എന്നതും ഒട്ടും മലിനീകരിക്കപ്പെട്ടിട്ടില്ല എന്നതുമാണ്. ഏറ്റവും സന്താഷകരം, പ്ലാസ്റ്റിക് മാലിന്യങ്ങള് കാണാന് തന്നെയില്ല എന്നതാണ്. അവിടുത്തെ നടത്തിപ്പുകാരെ ആ കാര്യത്തില് അഭിനന്ദിക്കണം.
തടാകത്തില് ബോട്ട് യാത്രയാവാം. തുഴയുന്ന തരവും, ചവിട്ടുന്ന തരവും ബോട്ടുകള് ലഭ്യമാണ്. യന്ത്രം ഘടിപ്പിച്ചവയില്ല, നല്ല കാര്യം. ഊഴത്തിനായി അധികസമയം കാത്തുനില്ക്കേണ്ടിയും വരുന്നില്ല.
തടാകത്തിനു ചുറ്റും നടവഴിയുണ്ട്. കാടും തടാകവും അതിരിടുന്ന വഴിയിലൂടുള്ള യാത്ര നല്ല ഒരു അനുഭവം തന്നെ.
പ്രകൃതിയുടെ പാശ്ചാത്തലം നോക്കിയാല് ഇതിലും മനോഹരമാവണം മൂന്നാറിലെ കുണ്ടള തടാകം. പക്ഷെ അവിടം വേണ്ടുംവണ്ണം പരിപാലിക്കപെടുന്നില്ല. ഇപ്പോഴത്തെ അവസ്ഥയില് പൂക്കോട് തന്നെയാവണം കേരളത്തിലെ ഏറ്റവും നല്ല തടാകം.
